Dječija igraonica

Dječija igraonica

Nova, moderno opremljena dječija igraonica sa velikim brojem raznolikih sadržaja za igranje otvorena je u okviru I faze Instituta Igalo. To je jedinstven i udoban kutak za bezbrižne dječije sate, bogato opremljen zabavnim igrama za mališane. Naši animatori brinuće o djeci, dok Vi budete odmarali ili na drugi način uživali u ponudama Instituta.

  • Psihološke radionice

    Posjetioci i korisnici sadržaja igraonice "Akvarijum" su sva djeca našeg grada i djeca na rehabilitaciji u Institutu. Ono što nas razlikuje od ostalih igraonica koje u sadržaju imaju prostor i animaciju za dječije rođendane (lavirint, bazen od loptica, karioke...) su psihološke i kreativne radionice koje će voditi eksperti za ovu oblast iz Instituta Igalo. Želja nam je da ponudimo mjesto gdje će se djeca okupljati, razgovarati i sticati vještine koje formalno obrazovanje ne nudi u tom obimu i na taj način.

    U radionicama, djeca će učiti vještine uspješnije, nenasilne komunikacije i emotivne pismenosti i asertivnosti koje, kada se dugoročno usvoje i primjenjuju, povećavaju zadovoljstvo i samoprihvatanje djece, a dugoročno smanjuju nasilno ponašanje među vršnjacima, budući da djeca jasno komuniciraju prepoznate potrebe na društveno prihvatljiv način. U ponudi će biti i radionice za djecu sa traumatskim iskustvom i iskustvom gubitka.

    Uzrast djece koja mogu pohadjati radionice je od 5 do 8 godina, od 9 do 12 i od 12 do 15 godina. Ukoliko bude interesovanja od strane adolescentne populacije, organizovaće se i „pričaonica” na teme koje zanimaju tinejdžere (bunt, stid, seksualnost, veze, odabir zanimanja i sl).

    Radionice se nude u paketu od 10 seansi. Održavaće se svake subote u terminima dogovorenim sa grupom.

    Prijave na tel: 330–276, e-mail: inig@t-com.me, ili u Institutovoj agenciji Inig.